O director xeral de Cultura, Anxo Lorenzo, inaugurou, na sede de Afundación de Vigo, a exposición ‘Retratos dun tempo da plástica galega’. Trátase do novo proxecto da Xunta de Galicia e Afundación co que se rende homenaxe a un centenar de artistas galegos, segundo informa a Consellería de Cultura.

A mostra é unha iniciativa do fotógrafo Xulio Gil, comisariada por Xabier Limia, que se poderá visitar na rúa Policarpo Sanz ata o 11 de novembro. O representante da Consellería de Cultura, Educación, FP e Universidades destacou a importante “contribución que fixeron á identidade cultural de Galicia os creadores retratados nesta iniciativa”.

“Figuras como Laxeiro, Isaac Díaz Pardo, Chelo Rodríguez, Menchu Lamas, Francisco Leiro, Antón Patiño, Din Matamoro, Berta Cáccamo, Manuel Quintana Martelo, Ángeles Iglesias, Manolo Buciños ou Soledad Penalta son os construtores da realidade cultural que temos hoxe en día e que é un referente no conxunto do país”, sinalou.