A serie de televisión ‘Rockefeller en Mondariz‘, que reconstrúe a viaxe do multimillonario estadounidense en Galicia, estréase este venres, día 11 de agosto, no salón de actos do Concello de Mondariz Balneario (Pontevedra).
Foi no verán de 1929, pouco antes de estalar o ‘crash’ da Bolsa de Nova York, cando o mozo John Davison Rockefeller chegou de viaxe a Galicia, onde visitou a catedral de Santiago, asistiu a unha corrida de touros en Pontevedra e aloxouse no Gran Hotel de Mondariz, onde se entrevistou co entón presidente do Goberno, o ditador Miguel Primo de Rivera.
Case cen anos despois daquela viaxe, o realizador Valentín Carreira reconstruíu a aventura de Rockefeller e en especial a súa estancia en Galicia, nunha serie documental coproducida por Televisión de Galicia e a Fundación Mondariz Amorno da auga.
Precisamente esta organización nun comunicado informou de que o audiovisual se estreará este venres, contando a volta ao mundo do multimillonario, na cal percorreu Europa, China, Xapón ou o Pacífico. Durante toda a viaxe, Rockefeller escribiu un diario ata a data inédito, que se conserva e cuxo relato é o fío condutor da serie.
