A Asociación de Empresas Galegas Musicais (AGEM), formada por máis de 40 empresas da industria musical galega, trasladou o seu malestar polo procedemento aberto polo Concello de Vigo para licitar un contrato de patrocinio do concerto de Guns N’ Roses que se celebrará no estadio de Balaídos o próximo 12 de xuño, por máis de 1,5 millóns de euros.
Esta entidade manifestou “fundadas sospeitas” de que o Concello de Vigo “articularía un procedemento preparado para garantir a contratación de Guns N’ Roses preservando a aparencia de legalidade a través do cumprimento dos principios de contratación do sector público”.
Esta sospeita dedúcese, explicou AGEM, “da contestación outorgada polo Concello á consulta desta asociación, onde o Concello se limitou a xustificar a elección do patrocinio publicitario como procedemento óptimo (…) sen realizar ningunha apreciación ao apercibimento que se lle fixo”.
Respecto diso, a Asociación explicou que, desde a súa experiencia, pode constatar a “imposibilidade” de materializar a contratación dun artista internacional nos 15 días habilitados polo Concello, “a non ser que as negociacións xa estivesen avanzadas previamente”, como é o caso do concerto de Guns N’ Roses, confirmado polos organizadores xa en febreiro. Concertos internacionais que, por outra banda soen ser anunciados con anticipación, como é o caso dos que contratan outros concellos ou a Xunta para o Xacobeo.
Segundo AGEM, este contrato podería articularse “en fraude de lei” por pretender dotar de seguridade xurídica un procedemento aberto a unha subvención directa para un evento concreto, xerando unha “grave distorsión no marco colaborativo público-privado” para este tipo de actuacións.
