O Concello de Gondomar, a editorial Galaxia e o Instituto de Estudos Miñoráns entregaron este domingo 22 de abril o XIV Premio de Poesía Victoriano Taibo, galardón que recaeu no poeta ourensán Javier Rodríguez González polo poemario titulado Xeración (Breve tratado de males inespecíficos).

O xurado valora que a obra constitúe a crónica dunha xeración que se trascende a si mesma, chegando a expresar un auténtico manifesto contra a cultura da cancelación na medida en que a memoria, tamén a recente, marca o momento actual e proxéctase nun diálogo cara ao futuro.

O poemario contén un alto interese histórico-cultural, ao mesmo tempo que se expresa cun léxico depurado e un ritmo áxil, ofrecendo unha proposta poética do devalar da existencia.

A obra gañadora será publicada na colección Dombate da Editorial Galaxia, onde a organización deséxalle o mesmo éxito que “Antese”, de Arancha Nogueira, poemario gañador do ano anterior, que xa vai pola segunda edición. O premio está dotado con 4000 € e unha peza escultórica, obra do artista miñorán Fino Lorenzo, fabricada desinteresadamente pola carpintería Meixoeiro.