O Boletín Oficial do Estado (BOE) publicou este xoves a declaración de Festa de Interese Turístico Internacional a Festa da lamprea de Arbo. Neste sentido, a directora xeral de Turismo, Nava Castro, felicitou ao municipio e mostrou a súa satisfacción ante este título.
Tal como informou a Xunta nun comunicado, Turismo de Galicia remitiu á Secretaría de Estado de Turismo o expediente administrativo co informe favorable para esta declaración, a partir da documentación achegada polo Concello de Arbo, entidade promotora da solicitude.
Este documento recolle que, de acordo cos datos, o evento cumpre os requisitos preceptivos para que sexa valorada pola Secretaría de Estado, organismo competente para formalizar esta distinción. Xa en 2016 a Festa da lamprea fora declarada de Interese Turístico Nacional, uníndose así a máis dunha decena de festexos galegos que contan con este distintivo.
