O pasado día 14 de xaneiro de 2023 o Concello de Redondela e o Concello de Tui asinaron xunto coa Deputación Provincial de Pontevedra a denominada “Declaración de Pontevedra” pola que as corporacións locais asinantes comprométense a adoptar determinadas medidas para promover a normalización do uso da lingua galega nas escrituras públicas e nos procesos xurisdicionais nos que tomen parte.

As administracións locais comprométense a que as comparecencias e actuacións xudiciais en nome das corporacións locais se realicen en lingua galega. Polo tanto, os letrados e procuradores que defendan e/ou representen ao Concello de Redondela ou ao de Tui nos procesos xudiciais nos que esta corporación sexa parte -e que se desenvolvan ante tribunais con sede na Comunidade Autónoma de Galicia- empregarán a lingua galega nos seus escritos e intervencións orais; e solicitarán daqueles tribunais que as resolucións se lles notifiquen como defensores e/ou representantes do Concello de Redondela ou de Tui se efectúen tamén en galego.

Así mesmo, todas as comunicacións, informes e atestados que as autoridades e empregados públicos locais destes Concellos  lles dirixan aos tribunais con sede na Comunidade Autónoma de Galicia redactaranse en lingua galega, ao igual que as escrituras públicas.