A Eurocidade Tui-Valença podería ser a primeira eurocidade europea unida por un vehículo
autónomo e sostible. Os mandatarios da Eurocidade, Enrique Cabaleiro, alcalde de Tui, e José Carpinteira, presidente da Cámara de Valença, amosaron o seu interese neste novo medio de transporte tras probar este mércores o prototipo deseñado polo Centro Tecnolóxico da Automoción de Galicia (CTAG), que está a realizar probas na vella Ponte Internacional, a rúa común que comparten ambos municipios.
O alcalde de Tui, Enrique Cabaleiro, destacou a importancia de que “o CTAG elixise este espazo para realizar esta proba”, e salientou que “foi un día importante para este territorio transfronteirizo polo que supón de innovación tecnolóxica en materia de mobilidade”. “Vemos neste proxecto unha oportunidade en aras de mellorar a mobilidade das persoas entre os núcleos históricos de Valença e de Tui”, proseguiu.
Os alcaldes solicitaron ao CTAG, que amosou “total colaboración”, estender este proxecto piloto máis aló da ponte internacional ata os conxuntos históricos das dúas cidades, para poder candidatar este proxecto á próxima convocatoria dos fondos POCTEP, programa Interreg VA España-Portugal.
Enrique Cabaleiro, pola súa banda, afirmou que “ese é o reto que temos por diante, e no que imos traballar porque nos parece un proxecto moi bo para este ámbito, e que ademais pode aportar moitísima mellora de mobilidade ao reducir o tráfico rodado de vehículos e apostar por un medio de transporte urbano, colectivo e totalmente sostible que pon o territorio no futuro”.
O CTAG leva meses probando na vella Ponte Internacional de Tui este novo vehículo, que forma parte dun proxecto europeo no que proban como a tecnoloxía 5G poden axudar a mellorar a condución autónoma en entornos complexos como os urbanos e transfronteirizos. Este vehículo eléctrico, aínda que é totalmente autónomo, deberá levar un supervisor.
“Concluídas as probas nuns meses, a presentación deste proxecto para toda Europa terá lugar na vella ponte internacional, o que suporá un escaparate moi importante para a Eurocidade“, sentenzan dende o Concello de Tui.
