‘As que limpan’, unha obra de ‘A Panadaría’ que aborda a loita das camareiras de piso e o turismo de masas, chega a Tui. Farao o vindeiro venres 11 de febreiro, ás 21 horas no Teatro Municipal. Pero hoxe mesmo ‘A Panadaría’ iniciou a súa residencia artística en Tui, pois ficarán até o día da estrea. Así, o equipo (formado integramente por mulleres) rematará de pulir aspectos artísticos e de pechar outros técnicos coma o deseño da iluminación.

Esta mañá tivo lugar a presentación da obra por parte das tres actrices, directoras e autoras da obra Areta Bolado, Noelia Castro e Ailén Kendelman, xunto ao alcalde, Enrique Cabaleiro e a concelleira de Cultura, Sonsoles Vicente. Alí, informaron de que entradas para a representación en Tui poranse á venda mañá martes, 1 de febreiro, ás 21 h en www.tui.gal aos prezos de 10€ e 8€.

A xira de ‘As que limpan’ continuará por Redondela, Vilagarcía de Arousa, Vigo, As Pontes, Viveiro, Foz, Ames, Oleiros, Santiago de Compostela, Gondomar, Monforte de Lemos, A Coruña, Lugo, Mos e Cedeira. Amais o 2 e 3 de abril estrarán a obra en castelán no Teatre El Musical en Valencia, e do 20 de abril ao 15 de maio estarán no Teatro María Guerrero en Madrid.