O deputado provincial Carlos Font, que este sábado participou no gabinete de crise pola explosión rexistrada en Tui, instou ao alcalde a “que dea prioridade ás necesidades das persoas afectadas á hora de investir as partidas económicas da Deputación”.

Respecto diso, a través dunha nota de prensa, o organismo provincial destaca que “o goberno de Carmela Silva pon a disposición do Concello de Tui case 3 millóns de euros en axudas da Deputación de Pontevedra para a traxedia de Paramos“.

“É cuestión de vontade”, subliñou o deputado provincial, quen trasladou á plataforma de afectados “total dispoñibilidade” do goberno provincial “para adecuar os fondos dos plans da Deputación ás consecuencias da traxedia”.

Neste sentido, Font sinalou que do Plan Concellos 2017 o goberno de Tui “ten aínda sen executar un total de 735.881 euros que pode destinar á catástrofe”.

Tamén instou ao rexedor a “que utilice os fondos da Liña 1 do Plan de 2019, dotado para Tui con case 740.000 euros”, diñeiro que, segundo apunta, “precisamente adiantouse a este ano por se algún concello tiña emerxencias ou necesidades pensadas nun principio ao amparo dos danos da vaga de incendios, pero que tamén podería utilizar para paliar as necesidades causadas por esta traxedia”.

O deputado provincial animou ao alcalde a utilizar estas axudas, que o organismo cuantifica “en total en 2.727.982 euros”. “É o goberno municipal quen ten que marcar as prioridades dos seus veciños no modelo de respecto á autonomía municipal que defende o goberno da nova Deputación”, resolve o comunicado.