Unha vez máis, o Biomercado de Tomiño resultou todo un éxito, segundo celebran desde o Concello. Centos de persoas así o confirmaron coa súa visita ao longo da xornada, atraídos polos numerosos produtos e actividades ofertados.
Rexistrouse unha gran participación nos obradoiros de pan e xogos, tamén nas degustacións para todos os padais, a exposición e venda de produtos ecolóxicos ou a artesanía e gastronomía saudables.
Non faltaron charlas sobre negocios emprendedores nin un toque musical da man de Sabela Cereijo e Cherry Sweet. Todas estas iniciativas puxeron de manifesto a consolidación do evento, que este ano chegaba a súa cuarta edición.
Novidades coma a preparación e degustación de pratos con estrugas (ortigas) e os obradoiros de pan foron dúas das grandes atraccións, espertando o interese de persoas de todas as idades.
Se ben a mañá rexistrou un bo número de visitantes, foi a tarde a que congregou maior afluencia de público.
Asemade, as charlas sobre emprendementos no rural, nas cales os promotores contaban a súa experiencia, foron outro dos focos de atracción, rexistrando boa asistencia de persoas interesadas. E tamén, por suposto, as clases de ioga.
O concelleiro de Promoción Económica, Antonio Tartglione, e demais organizadores, realizaron un balance moi positivo desta cuarta edición do Biomercado de Tomiño, tanto na cantidade e calidade dos postos que concorreron, coma na afluencia de público acadada.
