A Ruta “Petiscos con Arte” finaliza xa esta fin de semana despois de servirse máis de 1.200 petiscos na pasada fin de semana entre os 12 establecementos participantes. O evento, organizado a través da Concellería de Turismo, mestura a gastronomía e a arte para ofertar aos participantes unha experiencia para os sentidos cun total de 12 petiscos diferentes e 12 exposicións de temática variada: fotografía, pintura, escultura e ilustracións.
Os hostaleiros participantes serviron un aproximado de 100 petiscos cada un na primeira fin de semana e o balance xeral desta campaña é moi positivo, cunha boa afluencia de comensais, que aproveitaron para gozar da oferta gastronómica, á vez que admiraron as 12 exposicións que se poden ver en cada local.
A Ruta “Petiscos con Arte” está aberta o venres e sábado en horario de mañá de 12:00h a 14:00h e tarde 19:00h a 21:30h. Os 12 establecementos participantes nesta edición ofertan un petisco ao simbólico prezo de 1,50€, elaboracións gastronómicas para todos os gustos con potaxes, “montaditos”, tostas, sushi, entre outros.
Segundo manifestou Montserrat Magallanes, Concelleira de Turismo da Guarda, a finalidade da ruta é promocionar a gastronomía e a arte na Guarda, dinamizando o tecido de hostalaría do municipio nesta tempada post-estival cun valor engadido como é a arte, con exposicións para todos os gustos en locais coma o Art Café, La Botica ou O Cangrexal.
Cada participante que degusta un petisco recibe unha papeleta que cumprimentar cos seus datos persoais e depositar na urna, para entrar no sorteo de 5 lotes de viño da Adega colaboradora Gran Novás. Haberá un pequeno acto de entrega aos premiados no sorteo (un premio por persoa).