O pasado 19 de maio, o concello de A Guarda informaba públicamente da realización dunha batida de Xabaril para este sábado 21 de maio.

Xustificaba dita batida por “danos producidos nos cultivos” “e perigo para a circulación de vehículos, producindo accidentes de tráfico, así como para os cultivos, ocasionando graves trastornos para moitos cidadáns.”

A batida realizarase nunha zona delimitada e respectando as zonas de seguridade marcadas, estando organizada conxuntamente con axentes medioambientais do distrito forestal e forzas de seguridade da zona.

Pero a controversia está servida por varios puntos que o concello tivo que sair ao paso con outra nota de prensa, argumentando que o concello só informou dunha batida autorizada pola Xunta de Galicia, “Facemos saber que temos recibido moitas queixas en relación a incidentes con vehículos, accidentes de tráfico, destrución de cultivos e de valados e moitos sustos de persoas que se teñen atopado con xabaríns de forma imprevista” ainda sen precisar máis datos contabilizables de ditos feitos.

A caza en época de cría

A batida autorizada pola Xunta, aínda que o concello non fai público de onde parte a solicitude, xerou controversia mesmo nos propios cazadores que sinalan que é o peor momento para facer unha batida porque é época de cría. “Como cazador, a estas alturas facer unha batida…estando a criar….pois non comparto, podese facer no tiempo que é de caza, pero bueno, a culpa non é da xunta nin de nadie, é de quen vai, “

Outros critican o xeito no que se vai facer a batida, pondo en contraposición a medida adoitada no concello de Ferrol colocando xaulas para atrapar xabarils no entorno urbán para logo devolvelos ao seu hábitat natural no monte.

Dende o concello de A Guarda apoian a iniciativa como necesaria sen entrar a valorar o xeito de facelo. “Dada esta situación, entendemos que é necesario controlar a poboación de xabaríns no Monte Santa Trega debido a súa proximidade á zona urbana. Por suposto non entramos a valorar cal é o mellor método.“