Os positivos diarios confirmados por PCR en Vigo experimentaron un novo descenso, ata os 42, un total de 38 menos que na xornada anterior. Con todo, a área sanitaria que reúne a maior cifra de casos activos da enfermidade é Vigo, que este luns notifica 2.260, aínda que son 60 menos que o domingo.

HOSPITALIZACIÓNS

Na outra cara da moeda, soben notablemente as hospitalizacións en Vigo, ata as 99 -11 máis-, 25 delas en coidados intensivos -as mesmas-.

GALICIA

Segundo os datos actualizados este luns pola Consellería de Sanidade, con cifras solicitadas ata as 18,00 horas do domingo, a única área na que se rexistra un aumento dos casos é na de Pontevedra; e os positivos confirmados por PCR en Galicia sitúanse nos 323, un total de 134 menos que o día anterior.

Así mesmo, os datos de Sanidade reflicten que ata o momento se realizaron en Galicia un total de 854.141 PCR, o que implica que en 24 horas se fixeron 6.143 – 988 menos que no día anterior -. Estes datos – 323 contaxios por 6.143 PCR -, reflicten unha taxa de positividade do 5,2 por cento, cifra próxima ao 5% que marca a Organización Mundial da Saúde (OMS) para dar por controlada a pandemia.