O alcalde de Vigo, Abel Caballero, anunciou que o Concello aprobará de forma definitiva o vindeiro martes os proxectos de urbanización do barrio de San Paio de Navia.
Nun audio difundido aos medios de comunicación, o rexedor explicou que se aprobarán os polígonos 1, 2A e 2B da ampliación de Navia, que en total suman máis de 200.000 metros cadrados de extensión.
Segundo el, isto permitirá a construción de vivendas con algún tipo de protección nos polígonos 1 e 2B, mentres que o 2A estará destinado ao novo instituto de educación secundaria.
Sobre esta infraestrutura, volveu a pedir á Xunta que asine o convenio para que o goberno local lle ceda o terreo para que constrúa o centro educativo, pero comprometéndose aos prazos temporais que se marcan desde o propio Concello.
Todo iso tras anos de enfrontamentos entre Concello e Xunta pola ampliación de Navia, despois de que a Administración autonómica proxectase uns 1.600 pisos na zona.
Precisamente fontes do Goberno galego indicaron a Europa Press que, de producirse esta aprobación definitiva, permitiría por fin empezar a obra de urbanización do polígono 1 que xa está en licitación e tras iso comezar as obras das vivendas e sacar chan a concurso para promotores e cooperativas.
