O director xeral de Xustiza, José Tronchoni, visitou este mércores a Cidade da Xustiza de Vigo xunto cos responsables da Unidade de Vixilancia de Edificios Xudiciais para avaliar as medidas de seguridade implantadas no edificio.

No percorrido, apuntáronse tamén as necesidades e previsións de persoal e de medios materiais, unha vez asinado o convenio co Ministerio do Interior en materia de seguridade nos edificios da Administración de Xustiza en Galicia.

No marco deste acordo, o Goberno galego destinará entre 2022 e 2025 seis millóns de euros para que efectivos das forzas e corpos de seguridade do Estado realicen labores de vixilancia e protección nas instalacións xudiciais.

Esta prestación será desenvolvida por un máximo de 206 profesionais, 81 de Policía Nacional e 125 de Garda Civil. Dese total, a Cidade da Xustiza da urbe olívica contará con 13 policías e tres garda civís.