A delegada da Xunta en Vigo e presidenta do Consorcio casco Vello, Marta Fernández-Tapias, entregou este luns as chaves dos seus respectivos locais aos adxudicatarios que resultaron gañadores do concurso público, que suporá a chegada ao barrio de catorce novos negocios con actividades comerciais e culturais.

“Hoxe facemos a entrega oficial dos baixos a un total de 14 empresas para que poidan iniciar de forma inmediata a súa instalación no barrio, o que suporá unha importante dinamización da zona”, subliñou a representante autonómica.

Tal como indicou o Goberno galego, entre os novos adxudicatarios atópanse artesáns, autónomos, profesionais liberais, editoriais e colectivos culturais. Fernández-Tapias tamén informou de que o Consorcio casco Vello xa publicou no Boletín Oficial da Provincia de Pontevedra o proceso de adxudicación directa para outros seis locais.

Así, ata martes celebrarase unha xornada de portas abertas para dar a coñecer a todos aqueles interesados os baixos dos que dispoñen en varios puntos da zona histórica olívica. Con todo, a delegada da Xunta criticou que o Concello de Vigo “bloquease” hai dous anos esta iniciativa. “A xestión do Consorcio continúa adiante a pesar da permanente negativa do alcalde a calquera investimento da Xunta en Vigo”, subliñou Fernández-Tapias.