O Diario Oficial de Galicia (DOG) publica este venres o anuncio da Dirección Xeral de Calidade Ambiental polo que se fai pública a declaración ambiental desfavorable e, en consecuencia, o freo a que siga adiante o proxecto do parque eólico do Merendón, nos concellos de Oia e O Rosal, na Serra da Groba.

A declaración conclúe que o proxecto produciría “uns impactos críticos” sobre a paisaxe, que alterarían de forma “irreversible” os valores ambientais da zona, sen que tales efectos se poidan “mitigar con ningún tipo de medida correctora”.

En concreto, apúntase que a introdución dos aeroxeradores, como elementos novos na paisaxe, provocaría un impacto que resultaria “crítico” durante a vida útil da infraestrutura, e que reducirían “drasticamente” o valor estético e panorámica das áreas de especial interese paisaxístico da zona, así como do ámbito costeiro.

O rexeitamento ao parque do Merendón chega despois de que mes e medio atrás se emitise unha declaración desfavorable para outro parque, na mesma zona, o ‘Albariño I’.