O Consorcio da Zona Franca de Vigo estreou este martes a cuarta edición da súa incubadora de alta tecnoloxía centrada no sector da automoción, High Tech Auto, co impulso de nove novos proxectos.
Foi o delegado do Estado en Zona Franca, David Regades, o encargado de abrir a xornada, á que tamén asistiu Fany Suárez, subdirectora de Galicia Emprende, en representación do Instituto Galego de Promoción Económica (Igape) da Xunta de Galicia.
“A Zona Franca de Vigo xa é a vosa casa. Con isto quero dicir que sempre teredes un aliado no que confiar e no que apoiarvos”, subliñou Regades, alentando aos participantes a seguir esforzándose para conseguir chegar á consolidación dos seus proxectos e ser casos de éxito.
Tal como explicou o Consorcio nun comunicado, os proxectos que inician o seu camiño na incubadora teñen que ver coa electromovilidade, a carga de baterías, a creación de pezas customizadas para motocicletas, novas fórmulas de vehículos para persoas de mobilidade reducida, mellora na interconectividade dos vehículos e a fabricación de pezas mediante sistemas de impresións 3D con tecnoloxía SLM.
A High Tech Auto recibiu desde a súa fundación un total de 68 candidaturas de proxectos, dos que 40 pasaron a fase de incubación. Trátase dunha incubadora “única en España” e especializada no sector da automoción e supón unha oportunidade para favorecer a transferencia de tecnoloxía ao tecido empresarial do sector da automoción, sector auxiliar de compoñentes e servizos avanzados para a industria da automoción.
Está cofinanciada ao 80% pola Unión Europea a través do Fondo Europeo de Desenvolvemento rexional e é promovida pola Zona Franca e polo Goberno galego.
