O exboxeador Roberto Domínguez foi condenado a tres anos e tres meses de prisión por un delito de atentado e outro de resistencia á autoridade en dous xuízos celebrados este martes no Xulgado do Penal número 2 de Vigo.
Así, Domínguez chegou a un acordo de conformidade con Fiscalía no cal aceptou tres anos e un día de prisión por un delito de atentado polo incidente ocorrido no depósito municipal de vehículos. Foi a principios do mes de maio cando o exboxeador acudira unha mañá alí para retirar un coche que pertencera a unha das súas parellas, xa falecida, pero o empregado das instalacións non accedeu a darllo, xa que non figuraba el como titular do vehículo.
Por iso, Domínguez regresou pola tarde e, aproveitando un momento no que un guindastre saía do recinto, coouse no seu interior. Así, accedeu ao coche que buscaba, do que tiña chave, e arrincouno. Cando foi requirido polo persoal do depósito reaccionou de forma violenta, golpeando o parabrisas do vehículo.
Aínda que se solicitaban catro anos de cárcere, foi condenado a tres tras o acordo. Ademais, terá que pagar unha multa de 450 euros por un delito leve de danos e unha responsabilidade civil de 342 euros.
TRES MESES DE PRISIÓN
Este martes tamén se celebrou outro xuízo no cal Roberto Domínguez foi condenado a tres meses de prisión por un delito de resistencia á autoridade. A pesar de que o Ministerio Fiscal solicitaba inicialmente seis meses, as partes chegaron a unha conformidade reducindo a condena á metade.
Esta pena impúxose tras os sucesos ocorridos a finais do mes de abril na praia do Vao de Vigo, despois de que o exboxeador acudise ao domicilio da súa exparella reclamándolle baixo ameazas a entrega da filla que teñen en común.
Ata alí desprazáronse axentes de Policía, aos cales chegou a ameazar tamén cunha pa metálica de grandes dimensións. Tras iso, fuxiu ata a praia do vao, introducíndose na auga para non poder ser detido e gritando frases como “vouvos matar a todos, a vós e ás vosas familias” ou “teño as vosas caras, cando vos vexo coa vosa familia na rúa vouvos matar”. Finalmente, foi detido.
