A Feira Internacional de Produtos do Mar Conxelados Conxemar pechou este xoves unha edición “histórica”, cunha afluencia de máis de 26.000 compradores e provedores procedentes de 104 países, un 37% máis que en 2021.
Tal como informou a organización, ademais de España, o ‘top 5’ de países visitantes foron Portugal, Italia, Arxentina, Francia e Marrocos, que acudiron durante os 3 días que durou a XXIII edición de Conxemar.
Este ano a Feira estreou un pavillón adicional de 5.000 metros cadrados, elevando a súa superficie total ata os 37.000 metros cadrados con 700 expositores de 44 países. Nesta ocasión chegaron ata 17 delegacións internacionais, incluíndo o Ministerio delle Politeche Agricole Alimentari e Forestali de Italia, que se incorporou por primeira vez á oferta expositiva de Conxemar.
Precisamente este xoves o ministro de Agricultura, Pesca e Alimentación, Luís Planas, visitou o recinto, percorrendo as casetas internacionais e as principais empresas españolas do sector da transformación e comercialización de produtos do mar conxelados.
Na súa visita, aproveitou para felicitar á organización polo “éxito” da Feira, declarando que “o liderado hai que exercelo, non só proclamalo” e que “Conxemar é unha cita ineludible”. A Feira regresará os días 3, 4 e 5 de outubro de 2023, segundo adiantou a organización.
