Marea de Vigo cualificou de “espectáculo bochornoso” o novo “plante” que o alcalde da cidade olívica, Abel Caballero, realizoulle ao presidente da Xunta, Alfonso Rueda.
Nun comunicado, Marea de Vigo criticou que, ao seu xuízo, tanto o Concello de Vigo como o Goberno galego “están a utilizar as institucións públicas como estratexia electoral”.
“Hai cuestións de cidade que teñen que resolverse dunha vez por todas entre a Xunta e o Concello e esta actitude o único que está a facer é bloquear o desenvolvemento e a solución das mesmas”, lamentou o portavoz de Marea de Vigo, Rubén Pérez.
Por iso, ante a “incapacidade manifesta” que, ao seu xuízo, Caballero e Rueda teñen á fronte dos seus cargos, Pérez propuxo que “a partir de agora, as reunións entre ambas as administracións sexan circunscritas a cuestións concretas e, por tanto, sexan as direccións xerais ou o persoal técnico das administracións quen participe e resolva”.
