O alcalde de Vigo, Abel Caballero, criticou as “mentiras” da asociación de veciños do barrio de Teis e reivindicou que si se construirá unha biblioteca na zona.

Na súa rolda de prensa diaria, Caballero indicou que o pasado 30 de xuño si se aprobou un edificio para uso de sala de lectura e biblioteca. “Non sei de onde sacaron que non vai haber unha biblioteca. Son as mentiras da asociación de veciños que todo o que din son mentiras”, subliñou Caballero, tachándoos de “antigoberno” e de querer facer política.

“Están a traballar en política. Dígolle a Teis que non se deixen enganar. Imos facer unha biblioteca marabillosa”, engadiu Caballero.

Todo iso despois de que este xoves anpas e colectivos veciñais do barrio de Teis denunciasen que senten “enganados” polo goberno local, que anunciou a construción dunha biblioteca cando, en realidade, o que se prevé é unha sala de lectura.