A planta automobilística de Stellantis Vigo volverá sufrir unha parada na súa produción este sábado, debido á falta de aprovisionamentos, segundo informou a dirección da factoría ao seu persoal.

Así, “por causa de forza maior” a consecuencia desta falta de subministracións, queda suspendida a actividade do sistema 1 (o que monta os modelos Peugeot 2008, C-Elysée e Peugeot 301) na xornada deste sábado 1 de outubro.

Esta mesma semana, o mércores, o mesmo sistema tamén suspendeu a súa produción nas tres quendas, e as paradas estivéronse repetindo de forma continua. Así, neste mes rexistráronse máis dunha ducia de paradas.