Amigos da Terra vén de denunciar os vertidos de cascallos e restos de obras no río Barxa, na cidade de Vigo, ao carón do Hospital Álvaro Cunqueiro, localizados na senda peonil que vai rodeando o Hospital e nas proximidades do aparcodorio, segundo explican.

“Estes vertidos véñense producindo de xeito continuado nas semanas pasadas, e son aínda visibles na zona as rodaduras da camioneta ou tractor que os fixo”, denuncia a organización ecoloxista.

A orixe de ditos vertidos foi denunciada ante Augas de Galicia, a Consellería de Medio Ambiente e o Concello de Vigo para que realicen as inspeccións correspondentes por parte da administración.

Dende Amigos da Terra tamén solicitan información sobre as medidas que se están a adoptar para pór fin a esta situación que “afecta o ecosistema e a calidade do río Barxa”; e demandan “que se impoñan as correspondentes sancións aos infractores” e que se “repoña o medioambiente ao seu estado orixinario”.