Un incendio nun taller mecánico no Hío, no municipio pontevedrés de Cangas, deixou un traballador ferido ao sufrir queimaduras, polo que requiriu asistencia sanitaria. Segundo informa o 112 Galicia, o lume neste taller situado na PO-315 afectou varios vehículos e queimou parte das instalacións.
Sobre as 14,00 horas deste mércores, un axente da Policía Local de Cangas informaba ao 112 Galicia do ocorrido. Avisaba de que había un vehículo ardendo ás portas dun taller localizado na recta do Viso, á beira da estrada que conduce de Bueu a Vilariño.
Ata o lugar tamén se desprazaron efectivos dos Bombeiros do Morrazo e axentes de Protección Civil da localidade pontevedresa. Protección Civil facilitou o primeiro balance dos danos: arderon catro coches que se atopaban no exterior do local, así como se viron afectados varios vehículos máis. Tamén rexistraron danos a fachada e a porta de acceso ao edificio.
Pola súa banda, os servizos de extinción controlaroon por completo as chamas pouco antes das 15,00 horas. A continuación, encargáronse de arrefriar as estruturas afectadas e dos labores de ventilación correspondentes. O traballador ferido foi atendido polo persoal do 061, que se achegou ata o punto nunha ambulancia, na que foi trasladado ao centro hospitalario de referencia.
Así mesmo, os axentes de Protección Civil que participaron no operativo solicitaron ao 112 informar a Augas de Galicia pola proximidade do lugar á lagoa de Vilariño.
