A Federación Galega de Municipios e Provincias considera que a gratuidade das gardarías grava aos concellos, xa que “fronte aos máis de 300 euros mensuais por neno cos que a Xunta subvencionará ás gardarías privadas pola atención educativa, os centros municipais non recibirán máis de 169 euros polo mesmo concepto”.
Por iso, a Fegamp advertiu que a gratuidade das escolas infantís permanecerá “se o Goberno autonómico faise cargo realmente dese custo” porque, insistiu, “moitos destes centros están sufragados polos concellos”. Ante esta situación, a federación de municipios cre que o Goberno autonómico deixa aos centros locais “ao descuberto” ao destinar “5,5 millóns de euros á atención educativa”, mentres que esa partida, apuntan, “para as gardarías privadas ascenderá a 40 millóns de euros”.
Así mesmo, nun comunicado, expresou que avisara á administración autonómica de que o novo baremo podía “facer perigar a continuidade de centros”. Segundo a Fegamp, “non todos os concellos poderán afrontar os custos equivalentes ás cotas que ata agora achegaba os pais e nais”.
En todo caso, “en consideración ás familias”, asegura que as entidades locais manterán o servizo este curso, pero advirte que será “insustentable no tempo” e que se a Xunta quere implantar a gratuidade de forma permanente deberá dotar de fondos a medida.
Ademais, a Fegamp censura a “falta de diplomacia institucional” do Executivo galego por “atribuírse os méritos da medida en exclusividade” e “non recoñecer ao municipalismo a súa achega”, posto que as entidades locais “sufraxan 95 escolas públicas infantís de 0-3 anos e unha corentena de puntos de atención infantil”
