Axentes da Policía Local de Vigo detiveron a un veciño da cidade, J.F.P.I., de 55 anos de idade, por tratar de agredir presuntamente unha muller na vía pública e tentar golpear tamén os policías que actuaron para identificalo e acougalo.

Segundo informaron fontes do 092, os feitos ocorreron na tarde do pasado sábado, cando unha dotación que patrullaba pola Avenida de Fragoso observou un home agredindo unha muller e que, ao decatarse da presenza dos axentes, emprendeu a fuxida. Os policías conseguiron interceptalo e o home mostrouse moi agresivo, proferindo ameazas contra os funcionarios.

As testemuñas relataron que o sospeitoso insultara e tentara agredir unha muller, sen mediar provocación ningunha, e que unha amiga desta se interpuxo para evitar o ataque. Cando os policías estaban a actuar, tratando de acougar o aludido, este tentou agredilos a eles, polo que tivo que ser reducido para a súa posterior detención, como autor dun suposto delito de agresión e atentado contra axentes da autoridade.

O arrestado foi trasladado inicialmente á PAC da rúa Pizarro e, posteriormente, ao hospital Álvaro Cunqueiro, para ser sometido a unha avaliación psiquiátrica.