Vigo despediu na tarde deste mércores ao sindicalista Waldino Varela nunha cerimonia civil á que asistiron familiares, amigos, compañeiros de Comisións Obreiras (CC.OO.) e do Partido Comunista e representantes políticos como a vicepresidenta segunda do Goberno, Yolanda Díaz.

O tanatorio de Pereiró da cidade olívica foi o lugar elixido pola familia para despedir ao sindicalista e político vigués, que faleceu na noite do pasado luns aos 92 anos de idade. Entre bágoas, pero tamén algún sorriso lembrando todo o que fixo Varela para tratar de mellorar a sociedade na que viviu, os asistentes ao acto non relixioso, organizado conxuntamente pola familia, CC.OO. e o Partido Comunista, puideron dar un último adeus a Waldino Varela.

O primeiro en tomar a palabra foi Carlos Núñez, político que compartiu filas no Partido Comunista de Galicia con Varela na primeira lexislatura do Concello de Vigo en democracia. Núñez destacou do falecido que “nunca baixou a cabeza” e “sempre foi fiel ás súas raíces”, aínda que tivese que arriscar o seu traballo e a súa liberdade.

No acto tamén participou o escritor Xesús Alonso Montero, quen se referiu a Varela como un “exemplo de coherencia e fidelidade”, que traballou oito décadas “sen tirar a toalla por cáusaa comunidade”.

Rubén Pérez, portavoz de Marea de Vigo, agradeceu ao falecido ser o seu “referente” durante os seus primeiros anos de militancia e Amelia Pérez, secretaria xeral de CC.OO. en Galicia, pechou o acto asegurando que Waldino “guiou e seguirá guiando varias xeracións de sindicalistas”. Pola súa banda, Yolanda Díaz non quixo intervir na cerimonia, pero si trasladou a “dor” que supón perder a este “líder galego”.

Tras os discursos, o acto civil con corpo presente que durou pouco máis de media hora, terminou cos asistentes, preto dun centenar de persoas, cantando o himno comunista ‘A internacional’.