O alcalde de Vigo, Abel Caballero, asegurou este luns que o turismo da cidade vai “como un canón” ao superar o 85,2% de ocupación media no mes de xullo, oito puntos porcentuais máis que o 77% do mesmo mes de 2021.
Tal como informou o rexedor na súa rolda de prensa diaria, só o pasado fin de semana, o da ponte do 25 de xullo, a ocupación media alzouse ata o 93%, chegando o sábado 23 a colgarse o cartel de cheo en practicamente todos os hoteis de Vigo.
“Vigo xoga un papel moi importante no ámbito turístico deste país“, reivindicou Caballero, asegurando que as Illas Cíes, os concertos e o Nadal impulsaron o turismo durante todo o ano. Segundo el, trátase de visitantes “de altísima calidade”, que se hospedan en hoteis de 2, 3, 4 e 5 estrelas e que pasan varios días na urbe.
