Axentes da Policía Local de Vigo detiveron a un veciño da cidade, J.M.P., de 41 anos de idade, como presunto autor dun delito de atentado contra a autoridade e un de resistencia.
Segundo informaron fontes policiais, os feitos ocorreron na noite deste mércores, cando o 092 recibiu un aviso dunha testemuña que alertaba da presenza dun home na rúa Elio Antonio de Nebrija, que estaba a molestar a viandantes e chegou a empuxar a varios deles.
Coa descrición física achegada pola testemuña, unha dotación conseguiu localizar a este home que, ao decatarse da presenza policial, achegouse ao coche patrulla e cuspiu. A continuación emprendeu a fuxida, pero foi alcanzado na rúa Torrecedeira.
Ao ser interceptado, comezou a lanzar patadas e puñadas aos axentes, que tiveron que pedir reforzos dado o grao de agresividade do individuo. Finalmente, o home foi reducido e detido.
