Axentes da Policía Local de Vigo detiveron a un mozo de 23 anos de idade, de orixe mozambiqueño, como presunto autor dun delito de atentado contra a autoridade, ao ameazar e tratar de agredir aos funcionarios que o identificaron cando circulaba nun patinete eléctrico pola beirarrúa.

Os feitos ocorreron a última hora da mañá deste luns, cando unha patrulla do 092 observou na rúa Ecuador ao condutor dun patinete eléctrico circulando pola beirarrúa, polo que se dirixiron a el e déronlle o alto.

Tras identificalo e informarlle de que sería proposto para sanción, o mozo comezou a porse agresivo e desafiante, tentou abandonar o lugar e, cando un dos funcionarios impediullo, tratou de agredilo, á vez que profería ameazas graves.

Por estes feitos foi reducido e detido, como presunto autor dun delito de atentado contra axente da autoridade, e tamén por desobediencia e resistencia.

Por outra banda, a Policía Local tamén informou da identificación doutro condutor dun patinete, interceptado na madrugada deste martes na rúa Urzáiz cando circulaba sen luces, nin casco nin pezas reflectoras.

Cando os axentes lle deron o alto, decatáronse de que presentaba síntomas de alcoholemia, polo que o someteron a un test, que deu resultado positivo (0,69 mg/l). O usuario do patinete foi denunciado e o vehículo foi retirado ao depósito municipal.