Axentes da Policía Local de Vigo detiveron a dous veciños da cidade, X.L.R. e R.P.G., ambos de 38 anos de idade, como presuntos autores dun delito de lesións, tras emprendela a golpes con dous clientes dunha cafetaría, que estaban a defender a unha muller á que os sospeitosos tamén estaban a molestar.
Segundo informaron fontes policiais, os feitos ocorreron na madrugada do xoves, cando o 092 recibiu un aviso dunha pelexa multitudinaria na terraza dunha cafetaría da rúa Venezuela, con 5 persoas implicadas. No lugar estaba un axente fóra de servizo, que se personou ao decatarse do tumulto e trataba de separar aos implicados na liorta ata a chegada das patrullas.
Unha vez na zona, os funcionarios uniformados observaron que había dúas persoas sangrando de forma abundante polo nariz e pola boca, e que foron evacuados a un centro sanitario con fracturas no nariz e deformidades na cara.
Todas as testemuñas que se atopaban no lugar coincidiron no seu relato dos feitos: dous individuos baixaron dun coche á altura da terraza dunha cafetaría e comezaron a insultar e molestar aos clientes, así como aos viandantes.
Nun momento dado, dirixíronse de forma soez a unha das clientas do establecemento, que decidiu abandonar a cafetaría ante a incomodidade da situación. Pero os dous sospeitosos trataron de impedirlle que se fose, e outros dous clientes recrimináronlles a súa actitude.
En resposta a eses reproches, os individuos comezaron a golpear de forma brutal a estas dúas testemuñas, polo que foron detidos como autores dun delito de lesións.
