O alcalde de Vigo, Abel Caballero, confirmou este mércores que a cidade poderá beneficiarse das axudas anunciadas nas últimas horas polo Ministerio de Transportes, Mobilidade e Axenda Urbana para reducir un 30% o prezo dos billetes do bus urbano.
Nunha rolda de prensa, o rexedor lembrou que estas subvencións se aplicarán entre o 1 de setembro e o 31 de xullo próximos e “Vigo está totalmente incluído” nese programa de axudas, de maneira que, a partir de setembro, “vaise a sentir o efecto” da rebaixa das tarifas.
Segundo explicou, os usuarios do cartón PassVigo, que bonifica o prezo dos billetes, pasarán de pagar 0,89 euros a pagar 0,62 euros na modalidade ordinaria. No caso dos estudantes, a súa tarifa baixará de 0,86 a 0,60 euros; os universitarios pasarán de 0,67 a 0,47 euros; o bono social baixará de 0,69 a 0,48 euros; e os pensionistas de clase I e II seguirán viaxando gratis.
Así, recalcou, unha parte da bonificación do billete, que custa 1,40 euros sen o cartón PassVigo, seguirá sendo asumida polo Concello, e o resto subvenciónase con cargo ás axudas do Ministerio. “E a Xunta? A Xunta non reduce nada”, engadiu.
LAUDO ARBITRAL DE VITRASA
Por outra banda, o rexedor referiuse tamén á “magnífica noticia” do laudo arbitral que desestima a pretensión da concesionaria de bus urbano da cidade, Vitrasa, de aplicar un ‘descolgue salarial’ e reducir os soldos (ampliando xornada) ao seu persoal.
Caballero aplaudiu a decisión do árbitro designado pola Comisión Tripartita Galega, e reiterou o seu apoio ao persoal. Ao seu xuízo, esa resolución deulle “a razón integramente” nas súas formulacións, na súa “postura pública e apoio” aos traballadores.
Con todo, hai varias semanas, cando aínda o conflito non fora resolto e estaba pendente da decisión da Comisión Tripartita, o rexedor pedira á Xunta que paralizase o nomeamento do árbitro, ao entender que debía esperarse á resolución do contencioso administrativo. Así, o alcalde instaba á administración autonómica a frear o proceso, para “parar en seco as pretensións da empresa”.
