A Garda Civil trasladou na mañá deste mércores aos xulgados de Vigo a oito dos detidos no macroperativo policial contra o tráfico de drogas e a construción de ‘narcolanchas‘.
Fontes xudiciais e da investigación sinalaron que as persoas que pasaron a disposición do xulgado de instrución número 8 da cidade olívica foron detidas en Galicia e que os demais arrestados noutros puntos de España (ata un total dunha vintena) comparecerán ante a autoridade xudicial nas próximas horas, previsiblemente este xoves.
Esta operación policial, desenvolvida por efectivos do Equipo de Delincuencia Organizada e Antidroga (EDOA) da Garda Civil de Pontevedra, saldouse polo momento cunha vintena de detidos, 9 deles na provincia de Pontevedra.
Así, producíronse arrestos e rexistros nos partidos xudiciais de Vigo, O Porriño e Verín, así como en Toledo, Andalucía, Cataluña e o norte de Portugal. Ademais, os investigadores incautáronse de varias ‘narcolanchas’ en diferentes fases de construción.
