O Concello de Vigo solicitará un total de 9 millóns de euros ao Mitma, procedentes de fondos europeos, para a remodelación integral do edificio consistorial e para a reforma do complexo das piscinas das Travesas.
Así o confirmou en rolda de prensa o alcalde, Abel Caballero, que explicou que a actuación sobre o Consistorio realizarase en tres fases: a zona baixa do inmoble (desde os sotos á planta 2), a torre, e a terraza-miradoiro.
Para levar a cabo as actuacións convocarase un “concurso de ideas internacional”, segundo avanzou o rexedor, que apuntou que as obras no Concello teñen por finalidade mellorar a eficiencia enerxética, a habitabilidade dos espazos destinados á atención ao público, e mellorar a sustentabilidade. Así mesmo, actuarase na contorna do edificio para mellorar a súa integración, e a conexión con espazos como a Panificadora, o castelo de San Sebastián ou a propia Praza do Rei.
En total, para estas dúas primeiras fases, prevese un investimento de 9,3 millóns de euros, e o Concello solicitará axudas europeas por valor de 3 millóns.
A actuación completarase co acondicionamento da terraza do edificio, onde haberá miradoiro, cafetaría e contará cun ascensor panorámico. Para esa reforma, o alcalde xa anunciara hai uns días que se pediron outros 1,3 millóns de axudas europeas.
Ademais desta remodelación, que deixa atrás de forma definitiva o deseño proxectado no seu día por Rafael Moneo, e que nunca pasou de ser unha maqueta, o Concello prevé un investimento de case 5 millóns para reformar as piscinas das Travesas, e pedirá cofinanciamento da UE por outros 3 millóns de euros.
Neste caso, explicou Abel Caballero, a intención do goberno local é converter o complexo nun “centro de auga e benestar”, coa remodelación de fachadas e cubertas, a modernización dos sistemas, mellora da capacidade illante, protección solar nos acristalamientos, renovación dos vasos das piscinas, instalacións fotovoltaicas, e iluminación Led.
