O BNG de Vigo rexistrou unha petición para que o alcalde da cidade, Abel Caballero, convoque un “Debate do Estado da Cidade”, para que os veciños teñan oportunidade de coñecer as diferentes posicións políticas sobre a situación da urbe olívica, e poidan contrastar eses proxectos.
Así o anunciou o concelleiro nacionalista, Xabier Pérez Igrexas, que instou ao rexedor a ter “valentía” e convocar ese debate, ante a “permanente desvalorización” dun órgano como o Pleno Municipal, do que Abel Caballero “se ausenta de maneira reiterada” aos poucos minutos de iniciarse as sesións.
Por iso, para que os vigueses poidan “contratar as distintas alternativas” a un ano das eleccións municipais de 2023, pediu esa convocatoria, na que o catro forzas políticas que conforman a Corporación (PSOE, PP, Marea de Vigo e BNG) expresen as súas ideas. “Porque no BNG si que temos un proxecto de cidade sólido e solvente, construído sobre propostas concretas e cun afán construtivo”, engadiu.
Xabier Pérez Igrexas denunciou que o rexedor se instalase no seu “cómodo refuxio do monólogo” e tachou de “falta de respecto á cidade” as súas ausencias dos plenos cando se debaten as mocións da oposición, mostrando o seu “talante autoritario”. “Abel Caballero e o PSOE nunca quixeron debater co BNG nin con outras forzas políticas, nin no Concello nin nos debates organizados por medios de comunicación”, censurou.
O Debate sobre o Estado da Cidade está contemplado no regulamento orgánico do Pleno municipal, pero nunca se convocou na cidade, a diferenza doutras urbes galegas.
O edil do BNG pediu que se celebre ese debate un sábado pola mañá ou un día laborable a partir das 20,00 horas, no Auditorio Municipal, para facilitar a presenza do maior número posible de veciños. Tamén reclamou un mínimo de 10 minutos por cada quenda de intervención e oportunidade de réplicas, “para que non sexa unha sucesión de monólogos e para que haxa contraste”.
