A Universidade de Vigo instará ata 25 dispensadores de produtos de xestión menstrual gratuítos, repartidos entre os seus tres campus (Vigo, Pontevedra e Ourense).

As máquinas, desenvolvidas pola empresa Dismac, funcionarán previa lectura do código de barras do cartón universitario das alumnas e expenderán caixas de tres tampones ou tres compresas, dependendo da elección das mulleres. Cada estudante pode usalas un máximo de tres veces á semana.

“Este é un cálculo inicial, pero despois dun tempo de proba poderase reaxustar se se considera necesario”, indicou a directora da Unidade de Igualdade da UVigo, Águeza Gómez.

Tal como informou o Diario da Universidade de Vigo (DUVI), hai pouco máis dun ano, a UVigo deu un pasou máis para visibilizar e normalizar a menstruación ao proporcionar produtos de hixiene feminina a estudantes. Unha iniciativa que se fixo a través das delegacións de alumnado, mentres non se licitaba un servizo de dispensadores que agora, xa está en marcha.

As primeiras máquinas de autoservizos xa están en funcionamento no edificio de Ciencias Experimentais e nas próximas dúas semanas completarase a instalación dun total de 25 entre os tres campus.

Coa instalación destes dispensadores, a UVigo convértese en pioneira de toda España na aposta por achegar produtos de xestión menstrual de forma gratuíta ás alumnas. Segundo Gómez, as universidades escocesas xa ofrecen este tipo de produtos, “pero a través de cestas nos servizos”, non con máquinas expendedoras.

Para ela, trátase dunha medida “necesaria” que dá resposta a unha “reivindicación” das alumnas, que demandaban “dignificar unha necesidade fisiolóxica que as mulleres teñen sen que sexa opcional e acabar así coa cegueira de xénero”.