O BNG rexistrou unha proposta de declaración institucional para a súa aprobación no Pleno do Concello, co fin de apoiar a petición dos familiares dos mariñeiros falecidos tras o naufraxio da ‘Villa de Pitanxo’, para baixar ao pecio e buscar información que aclare o ocorrido.

O concelleiro nacionalista, Xabier Pérez Igrexas, tachou de “inxustificable” que o de Vigo sexa o único concello con vítimas mortais nese suceso que aínda non se pronunciou formalmente sobre as demandas das familias, e censurou que o alcalde non incluíse esta declaración na orde do día do pleno de abril.

“As vítimas do ‘Villa de Pitanxo’, entre as que se atopan varios vigueses, e as súas familias non merecen menos”, sinalou o edil, quen expresou o seu convencemento de que ese sentimento de apoio e solidariedade é compartido por todos os veciños da cidade olívica.