Os Bombeiros de Vigo tiveron que excarcerar na mañá deste luns a un octoxenario na cidade olívica despois de producirse un accidente no barrio de Bouzas, que acabou cun coche envorcado. Tal como aseguraron fontes do 112 Galicia a Europa Press, os feitos ocorreron ao redor das 10,00 horas desta mañá, e os servizos de emerxencia tiveron constancia dos mesmos a través da chamada dun particular.
Este veciño informaba de que se produciu un accidente na VG-20 de Vigo, á altura da rotonda previa á ponte de Bouzas, nas inmediacións de Zona Franca. O alertante avisaba de que unha persoa estaba atrapada no coche, que estaba envorcado.
Por iso, púxose o suceso en coñecemento da Garda Civil, da Policía Local, de Protección Civil e dos Bombeiros de Vigo. Estes últimos indicaron a Europa Press que tiveron que acudir ao lugar para excarcerar ao condutor do automóbil, que estaba atrapado, pero con vida, dentro do mesmo.
Segundo fontes do 061, o ferido tratábase dun home de 83 anos de idade, T.G.R., que foi trasladado ao hospital Povisa de Vigo nunha ambulancia medicalizada.
