O alcalde de Vigo, Abel Caballero, anunciou que o Concello solicitará 10,9 millóns de euros de fondos europeos para financiar proxectos que atraian turistas á cidade.

O rexedor indicou que esta cantidade irá destinada a financiar a creación dun centro multifuncional de turismo gastronómico e de recepción de visitantes na Praza da Igrexa (fronte á Colexiata), así como á construción dun miradoiro e un ascensor panorámico no edificio do propio Concello e á instalación dunha rampla mecánica no Paseo de Granada.

Segundo o alcalde, trátase dun “ambiciosísimo” proxecto que permitirá gañar turistas e virará arredor da Porta do Sol.

Para estas tres actuacións solicitarase un total de 8,7 millóns de euros, mentres que os outros 2,2 millóns serán para accións complementarias, como a creación dun sistema de iluminación eficiente no Casco Vello para destacar a calidade artística dos edificios.

Preguntado sobre se estas actuacións levarán a cabo se non se conceden as axudas, Caballero asegurou que si. Con todo, non concretou cando está previsto que estas obras se realicen.