Un home, D.G.R. de Vigo e 43 anos de idade, foi detido en Vigo o pasado sábado tras agredir a súa parella durante unha discusión, segundo informou a Policía Local nun comunicado.

Os feitos ocorreron sobre as 17,15 horas e foi a propia vítima a que alertou os axentes. Unha vez no lugar, ela explicou que por mor dunha discrepancia familiar se iniciou unha discusión coa súa parella.

No transcurso dela, segundo o seu relato, o home suxeitáraa polo pescozo e o antebrazo dereito, polo que presentaba roces compatibles cunha agresión, tal como recolle a Policía Local.

Por iso, os funcionarios dirixíronse ao interior do domicilio, onde se atopaba o suposto agresor, que foi detido como presunto autor dun delito de violencia de xénero.