O Festival de Cans, que recupera na edición de 2022 os concertos gratuítos, xa confirmou as actuacións de Dakidarría, Los Vinagres ou Juan Zelada, entre outros.
O certame, que se celebra na aldea de Cans –no Porriño– entre o 18 e o 21 de maio, contará coa actuación de Dakidarría o último día, no Espazo Estrella Galicia da Leira do Río. Tamén alí actuará a banda Los Vinagres, que presentarán o seu segundo álbum, Buen Clima.
A outra gran novidade da edición son os concertos gratuítos nocturnos e de pé, que volven tras a eliminación das restricións da pandemia por Covid-19. Así, ademais da Leira do Río, as actuacións musicais volverán a outras zonas como o Voulevar, coa animación da banda Breocáns Folk, ou o Torreiro de Cans, que acollerá actuacións como as de Juan Zelada, Caldo ou Astrogirl.
Segundo informou a organización nun comunicado, haberá ao redor de vinte directos de estilos e formatos variados, “moitos ligados á programación audiovisual do certame” como os de Javi Álvarez, do dúo Fluzo, a DJ Eme Dj e o líder da banda de Leit Motiv, Litus, que actuará xunto a Pablo Novoa no Espazo Rei Zentolo do Invernadoiro.
Outro dos retornos é o de Noite Lasal á praza do Concello, o xoves 19, con acceso gratuíto. O mércores o apartado musical correrá a cargo das Pandereteiras de Cans, os acordeonistas de Acordecans e as pandereteiras Fonteliño.
