Dous furtivos foron denunciados este sábado tras ser sorprendidos pola Policía Local de Vigo con capachos de centolas de 13,81 e 11,10 Kg, respectivamente.
Segundo informou a Policía Local, este sábado participaron xunto á Garda Rural da confraría de Pescadores nun operativo de control do furtivismo, levado a cabo entre as 09,40 horas e as 13,45 horas polos areais de Vigo.
Percorreron a costa desde a zona de Bouzas ata Portiño e identificaron cinco mergulladores, ademais dos dous furtivos denunciados.
No que respecta aos furtivos, relatan que na zona rochosa da praia Tombo do Gato, observaron a dous homes na auga, agachados, sen traxe nin elementos de mergullo e con luvas e cun caldeiro cada un.
Durante a vixilancia comprobaron que os homes enchían senllos caldeiros pequenos e, unha vez cheos, baleirábanos en capachos máis grandes, que tiñan ocultos na zona rochosa.
Localizado todo o material, os homes foron interceptados con seis nécoras entre ambos, nos caldeiros pequenos, “que rapidamente tiraron ao mar, ao decatarse da presenza dos compoñentes do operativo”.
Tal e como sinalaron, os capachos contiñan “gran cantidade” de centolas. Arroxaron un peso de 13,81 e 11,10 quilos respectivamente (o capacho pesa 0,729 quilos).
Así, os axentes procederon á identificación dos dous homes, de 55 e 56 anos e ambos de Vigo. O marisco foi devolto ao mar en presenza dos identificados, que foron propostos para sanción.
