O alcalde de Vigo, Abel Caballero, asegurou que na actualidade o número de reservas nos hoteis da cidade ocupan xa o 50% das habitacións dispoñibles en Semana Santa, cunha media que ascende ao 65% a partir do xoves, día 14 de abril.
Así o sinalou na súa rolda de prensa diaria, onde indicou que son datos “moi bos“, aínda que “quedan días” para que poidan entrar máis reservas nos establecementos. Caballero recoñeceu que a choiva é un “factor disuasor”, pero destacou que a perspectiva de ocupación é “francamente boa”.
PLAN PARCIAL DE NAVIA
Entre outros temas, o alcalde de Vigo indicou que o Tribunal Superior de Xustiza de Galicia (TSXG) rexeitou un recurso contencioso-administrativo contra o acordo adoptado no pleno do Concello de aprobación definitiva da segunda modificación puntual do plan parcial de Navia.
A sentenza desestima a demanda duns particulares que expuñan que a súa propiedade estiveses cualificada como urbano consolidado e non urbanizable. O texto é “contundente” e dá a razón ao Concello, segundo asegurou Caballero, dicindo que “non procede” excluír do plan parcial unha propiedade de chan urbano rodeado de urbanizable por todas partes. “Un novo aval dun ámbito urbanístico na cidade de Vigo”, reivindicou Caballero.
