A misión Alfa Crux, apoiada pola compañía viguesa Alén Space, lanzará este venres ao espazo un satélite para investigar no ámbito das comunicacións, segundo informou a empresa nun comunicado.

Así, este venres está prevista a posta en órbita do CubeSat 1O da misión Alfa Crux da Universidade de Brasília, un proxecto no que a empresa galega Alén Space, especializada no deseño, fabricación e operación de pequenos satélites, colaborou coa súa tecnoloxía e capacitación técnica.

“Se todo vai segundo o previsto, o lanzamento terá lugar este venres, día 1 de abril, ás 18,24 horas (horario español) desde a base aérea de Cabo Cañaveral (Estados Unidos), na misión Transporter-4 do foguete Falcon 9 de SpaceX. Alfa Cruz compartirá voo con outros 40 satélites no seu camiño cara á órbita terrestre”, explicou a firma viguesa.

A misión conta co apoio da Fundação de Apoio a Pescuda do Distrito Federal (FAPDF) e da Axencia Espacial Brasileira (AEB), ademais da colaboración de Alén Space. O obxectivo principal da mesma é investigar e experimentar dentro do campo das comunicacións da Internet das cousas, ademais de estudar os efectos do clima espacial nas comunicacións satelitales en latitudes ecuatoriais.

Alén Space proporcionou a tecnoloxía necesaria para o desenvolvemento da misión Alfa Crux e, a través do seu programa de formación, impartiu un programa de capacitación práctica ao equipo de estudantes da Universidade de Brasília encargado do desenvolvemento desta misión.

“As anteriores colaboracións abríronnos as portas para seguir traballando nun país e unhas institucións moi implicadas en proxectos do New Space. Estamos moi contentos de poder achegar a nosa experiencia e tecnoloxía neste proxecto”, reivindicou o director de Tecnoloxía da compañía galega, Alberto González.