Afundación fixo entrega á Fundación Provincial Banco de Alimentos de Vigo da media tonelada de doazóns que recadou no marco da iniciativa ‘Cultura por alimentos’.
Tal como indicou a obra social de Abanca nun comunicado, grazas á solidariedade da cidadanía das áreas de Pontevedra e de Vigo alcanzouse a media tonelada de produtos, entre conservas vexetais e de peixe e aceites, esencialmente.
Afundación reivindicou que no marco do seu fomento de propostas de acción social, continúa desenvolvendo un ambicioso programa no que os eventos culturais desenvolvidos nos centros da entidade animan á solidariedade, habilitando colectores que serven como puntos de recollida de alimentos que os visitantes queiran doar.
“Esta iniciativa de contribuír cun alimento con motivo da participación nos eventos gratuítos de Afundación estendeuse tamén a outras actividades con entrada, nas que o pago será unha equivalencia en forma de alimentos“, subliñou a entidade.
MÚSICA CLÁSICA
Por outra banda, Afundación tamén informou este mércores de que continúa coa súa tempada de música clásica organizada en colaboración coa Sociedade Filarmónica de Vigo, polo que este xoves, 31 de marzo, ás 20,00 horas a batuta de Michal Nesterowicz dirixirá a Orquestra Sinfónica de Galicia, acompañada polo violín de Philippe Quint, no Teatro Afundación de Vigo.
Este concerto tamén se enmarca dentro do programa ‘Cultura por alimentos’, así como o que se celebrará o próximo 19 de abril a cargo da Orquestra Barroca de Tenerife, ás 20,00 horas, entre outros.
