A factoría viguesa do grupo automobilístico Stellantis confirmou que renovará a actividade nas súas dúas liñas de produción o vindeiro martes, día 29 de marzo, pero só con dúas quendas por xornada.

Así, segundo trasladaron fontes da empresa, será a partir das 14,00 horas do próximo martes (xa que luns 28 é festivo en Vigo polo día da Reconquista) cando o sistema 1 da factoría volva operar, mantendo o esquema de traballo previsto, con dúas quendas por día para producir o mix actual dos Peugeot 2008 e 301 e do Citroën C-Elysée.

Pola súa banda, confirmouse a continuación da actividade no sistema 2, tamén con dúas quendas por xornada, seguindo o mesmo esquema que na liña 1. “A cadencia e o mix previsto serán os establecidos no programa”, indicou a compañía, que neste segundo sistema produce as furgonetas das diferentes marcas do grupo, como a Citroën Berlingo ou a Peugeot, Partner, entre outras.

“A xerarquía confirmará aos equipos a organización das quendas a medida que vaian avanzando as xornadas e en función da dispoñibilidade de compoñentes”, explicaron desde Stellantis.