A Zona Franca de Vigo recibiu este luns a unha delegación da rexión peruana de Tacna integrada por representantes empresariais de produtos pesqueiros e agrícolas, de turismo, así como directivos da Zona Franca de Tacna, Cámara de Comercio e da Universidade Privada de Tacna, que se reuniron co delegado David Regades.

“Con este primeiro encontro entre a Zona Franca de Vigo e de Tacna queremos establecer e fortalecer no futuro aínda máis eses lazos, que foron tan frutíferos, de forma que as empresas da área de Vigo poidan atopar aliados en Perú”, reivindicou Regades, segundo recolle Zona Franca nun comunicado.

Pola súa banda, a presidenta do directorio do Módulo de Servizos de Tacna, Luciana Biondi, sinalou que a intención é coñecer as experiencias e recoller todas as actividades e todo o desenvolvemento que ten Vigo para poder levala a Perú e poder desenvolver e emprender novos lazos.

A visita estivo organizada por ProInnóvate, do Ministerio da Produción de Perú, co apoio de Zona Franca de Vigo, e a delegación visitou tamén unha empresa pesqueira de referencia na área de Vigo.