O Concello de Vigo celebrará a Gala de Viguesas e Vigueses Distinguidos e a entrega da Medalla da Cidade o vindeiro mércores 23 de marzo, nun acto no Teatro García Barbón a partir das 20,00 horas.

Así o anunciou este luns o alcalde, Abel Caballero, quen indicou que esta gala se enmarca dentro do programa de actividades previstas pola Festa da Reconquista de Vigo e ten o obxectivo de render homenaxe “ás persoas e institucións que tanto fan pola cidade”.

Ademais, como cada ano, o día 28 de marzo levarase a cabo na Praza da Independencia un acto no que se lerá un pregón de agradecemento á cidade. “Vigo honra a quen coopera e deféndea e non presta atención a quen a ataca”, indicou Caballero.

O rexedor puxo en valor a “gran celebración” da Reconquista que se fará no Casco Vello e que patrocina “practicamente na súa totalidade” o Concello.