O Ministerio de Transportes, Mobilidade e Axenda Urbana resolveu favorablemente os proxectos presentados polo Concello de Vigo, polo que a cidade recibirá case 11 millóns de euros para levar a cabo obras como as ramplas de Gran Vía, o ascensor Halo ou a Vía Verde.
Tal como informou o Concello, estes fondos enmárcanse dentro do programa de axudas a municipios para a implantación de zonas de baixas emisións e transformación dixital e sustentable do transporte urbano.
Así, o Ministerio valorou “con moi alta cualificación” os proxectos das ramplas de Gran Vía, o ascensor Halo e a Vía Verde. Por iso, o alcalde, Abel Caballero, puxo de manifesto o seu “agradecemento e recoñecemento” ao Goberno, “que xa transferiu 12,2 millóns de euros a Vigo”.
O rexedor lembrou que Vigo xa recibiu fondos europeos doutros ámbitos, como os 671.000 euros para a mellora e a modernización do mercado de Teis ou os case 370.000 euros para a mellora do eixo turístico Teis-Bouzas.
